Logo Euskadi.eus
Kulturaren Euskal Behatokia-ren Logoa
Hizkuntza

Kultura Ohiturei buruzko Panela 7. jasoaldia - 2020

Kulturaren Euskal Behatokiak, Ohiturei buruzko Panelaren bidez, herritarren kultura-ohituren berri jaso eta eremu horretan sakontzea du xede. Ikerketa hori egiteko, lagin-unitate baten jarraipena egiten da denbora jakin batean, jarraipen horrek maila indibidualean aldaketa-patroien ezaugarriak zehazteko lagungarri diren inguruabarrak behatzeko aukera ematen baitu.

Atala

Lagina 204 pertsonez osatuta dago, eta denek ala denek parte-hartze kulturalaren gutxieneko atalase bat gainditzen dute. Hura orekatzen duten 3 irizpidetatik abiatuz eraikitzen da, aldaera hauen arabera:

  • Lurralde historikoak (Araba % 15,7; Gipuzkoa % 35,3; Bizkaia % 47,5; pertsona bat EAEtik kanpo dago gaur egun)
  • Sexua (emakumeak % 50, gizonak % 50)
  • Adina (% 50,5, 2000-1988 urte bitartean jaioak; % 49,5, 1987-1976 urte bitartean).

Zazpigarren jasoaldi honetan, ordezte-tasa % 5ekoa izan da, eta oinarrizko irizpideei erreparatuz ordeztu dira. Landa- lana 2021eko urtarrilaren 18tik 2021eko otsailaren 17ra egin zen. Covid-19a dela eta, 2020ko lehen erdiko jasoaldia ez zen egin.

Txostenak hiru atal ditu:

  1. Aldaketa-ibilbideak. Hautemandako aldaketa-ibilbideak deskribatzen dira, partaidetza-mailen indizeak eraikiz. Igotzeko, mantentzeko edo jaisteko joerak sortzen dira, parte-hartze motaren arabera (hartzailea, sortzailea edo digitala).
  2. Covid-aren osteko joerak kultura-ohitura digitaletan. Jasoaldi honetan, kultura-ohitura digitaletan joerak hautemateko berariaz diseinatutako modulu bat gehitu da, inkestatutako pertsonen ohitura pertsonalei eta gizarte- mailako aldaketari buruz duten iritziari buruzko balorazioarekin.
  3. Aldaketaren pertzepzio subjektiboa. Atal hau inkestatutako pertsonek beren parte-hartze kulturala nola aldatu den azaltzeko ematen dituzten arrazoiei buruzkoa da, eta aurreko jasoaldiekin alderatzen dira arrazoi horiek.

Gaur egungo testuinguruan, Covid-19aren eragina islatzen du panelak, eskariaren eta kultura-ohituren ikuspegitik. Beraz, informazio baliotsua ematen du. Beste azterlan batzuetan Covid-19aren inpaktu heterogeneoari buruz egindako behaketa asko indartzen ditu, eta eragin hori hobeto ezaugarritzen laguntzen du, publikoetan oinarritutako ikuspegitik egiten baita. Gogoratu behar da parte-hartze kulturalaren gutxieneko atalase bat gainditzen duten pertsonek osatzen dutela paneleko lagina. Hau da, gutxienez ohiko publiko kulturaltzat har daitezkeen pertsonak aztertzen dira.

Emaitzak eskema modura aurkezten dira, eta, kasu bakoitzean, blokearen asmoak erakusten dira: neurgaiak, neurtzeko modua, emaitzak eta interpretazio-iruzkina. Eranskinean aldagaien eta beren kodetzearen xehetasunak aurki daitezke.